
遍知贝玛嘎波大师教言集PK59རྗེ་བཙུན་བྱམས་པ་ལ་བསྟོད་པ་དང་། རྗེ་ཙོང་ཁ་པ་ཡབ་སྲས་ལ་ཆེད་དུ་སྔགས་པ་བཞུགས་སོ།།
10-99
༄༅། །རྗེ་བཙུན་བྱམས་པ་ལ་བསྟོད་པ་དང་། རྗེ་ཙོང་ཁ་པ་ཡབ་སྲས་ལ་ཆེད་དུ་སྔགས་པ་བཞུགས་སོ།།
༄། །རྗེ་བཙུན་བྱམས་པ་ལ་བསྟོད་པ།
༄༅༅། །རྗེ་བཙུན་བྱམས་པ་ལ་བསྟོད་པ་དང་། རྗེ་ཙོང་ཁ་པ་ཡབ་སྲས་ལ་ཆེད་དུ་སྔགས་པ་བཞུགས་སོ།།
10-100
༄༅། །བཅོམ་ལྡན་འདས་བྱམས་པའི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། །གང་སྔོན་བསྐལ་ཆེན་གྲངས་མེད་ཆེས་གྲངས་མེད། །རིན་ཆེན་གདུགས་དྲུང་བསྟན་པའི་བློ་གྲོས་གྱུར། །སེམས་ཅན་བྱེ་བ་བརྒྱ་
སྟོང་རྣམ་ཐར་འདིར། །བཀོད་པས་ཁྱོད་མཚན་བྱམས་པ་ཞེས་གྲགས་ལ། །ད་ལྟ་ཤཱཀྱའི་དབང་པོས་སྔོན་བཞེས་པའི། །རིན་ཆེན་ཅོད་པན་ཉིད་ཀྱི་དབུར་བཅིངས་པས། །རྒྱལ་བའི་རྒྱལ་ཚབ་བཅོམ་ལྡན་མ་ཕམ་པ། །ལྷ་
མི་ཀུན་གྱི་སྟོན་པ་ཆེན་པོར་གྱུར། །མ་འོངས་ཁུག་པ་དང་པོའི་བརྒྱད་ཁྲི་ལ། །འཁོར་ལོས་སྒྱུར་རྒྱལ་དུང་གི་འདུན་ན་འདོན། །འཁྲུངས་ནས་མངོན་པར་སངས་རྒྱས་ཚུལ་བསྟན་པ། །བསྐལ་བཟང་སྒྲོན་མ་ལྔ་
པའི་སྨོན་རྫོགས་མཛད། །དེ་བས་མགོན་པོ་ཁྱོད་ཀྱི་ཞབས་མཐིལ་ལ། །གཏུགས་ཏེ་སྐྱེ་བ་ཀུན་ཏུ་ཆོས་ཉན་པར། །འདོད་པས་གདུངས་ལ་ཐུགས་རྗེའི་སྤྱན་རས་གཟིགས། །བསོད་ནམས་རྒྱ་མཚོས་བསྒྲུབས་པའི་མཚན་དཔེའི་འོད། །
དམར་སེར་ལྷུན་པོའི་ངོགས་ལ་ཆགས་པའི་གཟི། །འཇིག་རྟེན་གསུམ་ཅི་དག་པའི་ཞིང་དུ་ཡང་། །དཔེ་ཟླས་འཕོངས་དེ་མངོན་སུམ་འགྱུར་བ་མཚར། །མཐོ་རིས་མཛེས་པའི་ལག་པས་བརྒྱུས་པ་ཡི། །རིན་ཆེན་མེ་ཏོག་
འཕྲེང་བ་རྒྱན་ཀུན་གྱིས། སྤུད་པས་མཛེས་པ་ཉིད་ཀྱང་མཛེས་བགྱིད་པ། །འདྲེན་བྱེད་ལྷ་ཡི་རྣ་བའི་བདུད་རྩི་ལགས། །དབང་པོའི་གཞུ་ཡི་མདངས་ཀྱང་མོག་བྱེད་པའི། །ལྷ་རྫས་གོས་ཀྱིས་རྣམ་པར་ཀླུབས་ནས་སུ། །
10-101
ལྷ་བརྒྱའི་རལ་བའི་སྟེགས་བཅས་སེང་གེའི་ཁྲིར། །ཆོས་ཀྱི་སྒོ་མང་འགྱེད་དེར་ཕྱག་འཚལ་ལོ། ། ཕྱོགས་བཅུའི་རྒྱལ་བ་རྣམས་དང་ཆོས་དཀོན་མཆོག །ཚོགས་མཆོག་ཀུན་ལ་རྟག་ཏུ་སྐྱབས་སུ་མཆི། །བདག་གིས་སྔོན་ཆད་
ཁྱོད་ཀྱི་བཀའ་འདས་ནས། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་ངག་ཡིད་ཀྱིས་སྡིག་པ་བགྱིས་པ་དང་། །བགྱིད་དུ་རྩལ་དང་རྗེས་སུ་ཡི་རང་བ། །སངས་རྒྱས་འབྱུང་བ་མཉེས་པར་མི་བྱེད་
ཅིང་། །ངན་འགྲོའི་ལམ་དུ་གཞོལ་བ་ཅི་སྤྱད་པ། །དེ་དག་ཁྱེད་ཀྱི་སྤྱན་སྔར་བཤགས་པ་དང་། །མི་འཆབ་མི་སྦེད་སླན་ཆད་མི་བགྱིད་པའི། །སྡོམ་པ་དམ་པ་ཡང་དག་བླང་བར་བགྱི།། །།
༄། །རྗེ་ཙོང་ཀ་པ་བློ་བཟང་གྲགས་པ་ལ་བསྟོད་པ་བཞུགས་སོ།།
རྗེ་ཙོང་ཀ་
པ་བློ་བཟང་གྲགས་པ་ལ་བསྟོད་པ་བཞུགས་སོ། །ཆོས་ཀྱི་རྒྱལ་པོ་ཆེན་པོ་ཤར་ཙོང་ཀ་པ་བློ་བཟང་གྲགས་པའི་དཔལ་གྱི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། །དགེ་ལེགས་ཆུ་
གཏེར་ཆེན་པོས་འཇིག་རྟེན་ལ། །བློ་བཟང་ཉིན་མོར་བྱེད་པ་ཁྱོད་སྦྱིན་ཚུན། །ས་འདི་རྨོངས་པའི་མུན་ལས་རྣམ་རྒྱལ་ཞེས། །གྲགས་པའི་གཞིར་གྱུར་དེ་ལ་ཕྱག་འཚལ་ལོ། །གང་དང་རྒྱལ་བ་ཀུན་གྱི་ཡོན་
ཏན་ནི། །སྲང་ལ་གཞལ་བཞིན་ལྕི་ཡང་མ་མཆིས་པས། །ལྔ་བརྒྱ་པ་ཡི་གཙུག་རྒྱན་དུ་འོས་པ། །ཐམས་ཅད་མཁྱེན་པ་ཁྱོད་ལ་ཕྱག་འཚལ་ལོ། །སེང་གེའི་ཁྲི་ལ་སེང་གེའི་སྒྲ་བསྒྲགས་པས། །སྨྲ་བའི་གླང་ཆེན་ཐམས་ཅད་དངངས་གྱུར་ཕྱིར། །
10-102
མཚུངས་བྲལ་ཁྱོད་ནི་སེང་གེའི་ང་རོའི་མཚན། །བསྐལ་བཟང་སྒྲོན་མར་འགྱུར་ལ་ཕྱག་འཚལ་ལོ། །ལྷག་པའི་ཚུལ་ཁྲིམས་ཧ་རི་ཙན་དན་བསུང་། །ཁྱོད་དྲིན་དྲི་བཞོན་གྱིས་འདིར་ཁྱོངས་པས་སུ། །འཁོར་བའི་ཚད་གདུངས་
མིང་ཙམ་ལྷག་གྱུར་པས། །སློབ་མར་བཅས་པ་བསྔགས་འོས་དེར་ཕྱག་འཚལ། །ཤིན་ཏུ་ཟབ་ཞི་ཆོས་ཀྱི་བདུད་རྩིའི་དཔྱིད། །རིགས་པའི་སྣོད་བཟང་བསྲལ་ནས་ལྟ་བའི་དུག །མ་ལུས་སེལ་བའི་སྙན་པ་ཆེན་པོ་
བ། །ཆོས་རྗེ་བླ་མའི་ཞབས་ལ་ཕྱག་འཚལ་ལོ། །གང་གི་ཐུགས་རྗེའི་ལྕགས་ཀྱུས་བཀུག་གྱུར་པས། །སྐལ་བཟང་ཚངས་པ་མཚུངས་པར་སྤྱོད་ཐམས་ཅད། །ཉིད་ཀྱི་རིང་ལུགས་ཞུགས་པ་གངས་རིའི་ནང་། །བྱ་རྒོད་ཕུང་
པོའི་དཔལ་འདྲར་བསྒྱུར་དེར་འདུད། །དུས་གསུམ་གསལ་ལེར་གཟིགས་པས་ལུང་བསྟན་པ། །ཀུན་གྱི་ཐོག་བབ་འདི་ཙམ་ལས་གཞན་དུ། །ཁྱོད་ཀྱི་ཏིང་འཛིན་ལྷག་པའི་ཤེས་རབ་སྩལ། །རྒྱ་མཚོའི་མཐས་རྟོགས་མིན་ཞེས་བདག་
གིས་བསྟོད། །ནམ་མཁའི་ཁྱོན་དང་འགྲོ་བའི་མཐའ་ཇི་སྲིད། །སྐུ་གསུང་ཐུགས་ཀྱི་གསང་བ་བརྡལ་བས་ན། །མ་ལུས་བརྗོད་པར་སུས་ཀྱང་མི་སྤོབས་པས། །མི་ཟད་རྒྱན་གྱི་འཁོར་ལོར་ཕྱག་བགྱིའོ།། དེ་ལྟར་སྐྱབས་
ཀྱི་བླ་མ་ཁྱོད་བསྟོད་པས། །འདི་ཀ་ཕྱོགས་བཅུའི་རྒྱལ་བ་ཀུན་བསྟོད་པ། །ཡིན་ཕྱིར་དགེ་དེས་ཐུབ་བསྟན་རྒྱས་པ་དང་། །འགྲོ་རྣམས་ཕན་བདེའི་དཔལ་གྱིས་རྗེས་འཛིན་ཤོག །བདག་ཅག་རྣམས་ཀྱང་དེང་ནས་བྱང་ཆུབ་བར། །
10-103
ཡོངས་ཀྱི་དགེ་བའི་བཤེས་གཉེན་རྣམས་བསྟེན་ནས། །བྱང་ཆུབ་དམ་པའི་སྤྱོད་པ་ལ་བསླབས་པས། །རྣམ་མཁྱེན་རྫོགས་པའི་སངས་རྒྱས་ཐོབ་གྱུར་ཅིག །ཅེས་པ་འདི་ཤར་རྩེ་ནས་དགེ་བའི་བཤེས་གཉེན་ཆེན་པོ་ནམ་
མཁའ་རྒྱལ་མཚན་གྱིས་གནས་འདི་ལ་ཁྱེད་ཀྱིས་བསྟོད་པར་འོས་ཞེས་བསྐུལ་བ་ལྟར། །པདྨ་དཀར་པོས་རྗེ་བླ་མ་དེ་ཉིད་ཀྱི་སྐུ་གདུང་གི་མདུན་དུ་དད་པས་སྦྱར་བའོ།། །།
༄། །རྒྱལ་ནས་ཐམས་ཅད་མཁྱེན་པ་ལ་བསྟོད་པ།
རྒྱལ་ནས་ཐམས་ཅད་མཁྱེན་པ་
ལ་བསྟོད་པའོ།། འཕགས་པ་སྤྱན་རས་གཟིགས་དབང་ཕྱག་གི་སྒྱུ་འཕྲུལ་གྱི་སྐུ་འབྲོམ་རྒྱལ་བའི་འབྱུང་གནས་ལ་སོགས་པ་ཡང་དག་པ་ཡོངས་ཀྱི་དགེ་བའི་བཤེས་གཉེན་འབའ་ཞིག་ཏུ་རྣམ་པར་རོལ་བ། རྒྱ་
བོད་ཧོར་སོག་གི་ཡུལ་པ་ཐམས་ཅད་ཀྱི་སྐྱབས་དང་སྐྱོབ་པ་བླ་ན་མེད་པ་བསོད་ནམས་རྒྱ་མཚོའི་ཞབས་ཀྱི་པདྨོ་ལ་གཏུགས་ཏེ་གུས་པ་ཐམས་ཅད་ཀྱིས་ཕྱག་འཚལ་ལོ། །བསྟན་སྐྱོང་བློ་བཟང་གྲགས་
པའི་གཏེར་བརྡོལ་ནས། །སྡེ་སྣོང་ཕུལ་བྱུང་བཤད་པའི་མཛོད་རྒྱས་པ། །ཕངས་མེད་སྦྱིན་པས་ཐམས་ཅད་སྒྲོལ་བའི་ལྷ། །ཟླ་མེད་རྗེ་བཙུན་བླ་མར་གསོལ་བ་འདེབས། །བཅས་རང་ཁ་ན་མ་ཐོ་ཕྲ་མོས་ཀྱང་། །
འཁོར་བར་མ་ནུས་སྡོམ་བརྩོན་དམ་པའི་རྗེ། །མཐོང་ཐོས་དྲན་པ་ཐམས་ཅད་འཚེངས་འགོད་པ། །ཟླ་མེད་། བསོད་ནམས་སྟོབས་ལྡན་རལ་པས་ཞབས་བརྟེན་ལན། །ངོ་མཚར་རྒྱ་མཚོའི་རྣམ་ཐར་སྟོན་མཛད་པས། །མཐུ་སྟོབས་དབང་ཕྱུག་དབུས་ན་མངོན་མཐོ་བ། །
10-104
ཟླ་མེད་། །དེ་ལྟར་ཁྱོད་ལ་གསོལ་བ་བཏབ་པའི་མཐུས། །ཚུལ་གནས་ཐོས་བསམ་སྦྱངས་པ་མཐར་ཕྱིན་ནས། །བསམ་གཏན་ལ་གཞག་ཤེས་རབ་མཆོག་སྐྱེས་པས། །ཉོན་མོངས་ཤེས་བྱའི་སྒྲིབ་པ་བྱང་གྱུར་ཅིག །མི་རྟག་
འཆི་བ་དྲན་པའི་སྐྱོ་ཤས་ཀྱིས། །ཚེ་འདིའི་སྣང་ཤས་ཐམས་ཅད་རང་ཞི་ཞིང་། །འགྲོ་དྲུག་ཕ་མར་སྙིང་ནས་མཐོང་གྱུར་པས། །གཞན་དོན་འབའ་ཞིག་ལྷུར་ལེན་ཉིད་གྱུར་ཅིག །ཅེས་པ་མཚན་སྒྲོག་མཁན་པོས་
བསྐུལ་ནས་དཔལ་འབྲུག་པ་པདྨ་དཀར་པོས་སྦྱར་བའོ།། ཡང་དེ་ཉིད་ལ་བསྟོད་པ། །ཐམས་ཅད་མཁྱེན་ཅིང་གཟིགས་པ་ཆེན་པོ་བསོད་ནམས་རྒྱ་མཚོའི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ལོ། །བྱང་
ཆུབ་དམ་པར་ཐུགས་བསྐྱེད་རྫིངས་བཅས་ནས། །བསོད་ནམས་ཡེ་ཤེས་རྒྱ་མཚོའི་ཕར་བྱོན་ཏེ། །རྣམ་གྲོལ་ནོར་བུའི་ཚོགས་ལ་དབང་བསྒྱུར་བའི། །ཆོས་ཀྱི་དེད་དཔོན་ཞབས་ལ་གསོལ་བ་འདེབས། །རྒྱལ་བའི་དབང་པོ་ཁྱོད་
ཀྱི་སྤྱན་རས་ནི། །འགྲོ་ལ་གཟིགས་པ་སྐད་ཅིག་ཡོལ་མིན་པས། །འདུལ་བྱའི་དུས་བབ་དེ་དེར་འཇལ་བྱེད་ཀྱི། །སྣ་ཚོགས་གཟུགས་སྐུའི་འབྱུང་གནས་དེ་ལ་འདུད། །བསོད་ནམས་མྱུ་གུ་རྣམ་སྤེལ་དགེ་འདུན་ཞིང་། །
ཕྱོགས་བཅུར་རྒྱས་པའི་བྱེད་པོར་གྲུབ་པ་ཡི། །རྣམ་ཐར་རྒྱ་མཚོ་བསྟན་ཡང་སྙེམས་བྲལ་བ། །ཡོངས་ཀྱི་ཡོངས་འཛིན་དམ་པ་དེ་ལ་འདུད། །ཐམས་ཅད་གཟིགས་པ་ཡེ་ཤེས་ཆེན་པོའི་མདངས། །བརྒྱད་ཁྲི་བཞི་སྟོང་ཆོས་ཀྱི་སྒོ་བྱེ་བར། །
10-105
མ་ལུས་འཁྲིད་པའི་རོལ་མོ་ལ་ཆགས་པ། །རྫོགས་པའི་སངས་རྒྱས་དངོས་བྱོན་དེ་ལ་འདུད། །སེན་མོའི་འོད་དཀར་འཛུམ་གྱིས་འཁྱུད་པའི་དཔྱིད། །དམར་བའི་ཞབས་མཐིལ་པད་རྫིང་དཔལ་དམ་པར། །གསེར་གྱི་ཅོད་པན་
འཆིང་ལས་ལྷག་གུས་པས། །ཁམས་གསུམ་འགྲོ་བའི་རྒྱན་གྱུར་དེ་ལ་འདུད་། །རྒྱལ་བ་ཉིད་ཀྱི་གཞལ་བྱ་ཁོ་ན་བས། །བདག་ཅག་སྨྲ་བ་སྤྱི་བརྟོལ་ཉིད་པས་ཀྱང་། །ཆོས་ཀྱི་རྗེས་འབྲང་དད་པའི་རང་གཟུགས་
ནི། །ཁྱོད་ཀྱི་ཡོན་ཏན་བརྗོད་བྱར་སུ་ཡིས་ལྷོགས། །དེ་ལྟར་རྗེ་བཙུན་བླ་མར་གསོལ་བཏབ་དགེས། །སྐྱེ་བར་བཤེས་གཉེན་དམ་པའི་ཞབས་བསྟེན་ནས། །སྨོན་འཇུག་བྱང་ཆུབ་སེམས་ཀྱིས་རྒྱུད་བཏུལ་ཏེ། །རྫོགས་པའི་སངས་
རྒྱས་ཐོབ་པར་གྱུར་ཅིག་གུ། །ཞེས་པ་འདི་ཡང་སེར་ར་བྱེས་པའི་སློབ་དཔོན་དགེ་བའི་བཤེས་གཉེན་དཔལ་འབྱོར་བསོད་ནམས་ལྷུན་གྲུབ་ཀྱི་ངོར། །པདྨ་དཀར་པོས་འཕྱོང་རྒྱས་སྟག་སྩེར་སྦྱར་བའོ།། །།
༄། །རྒྱལ་བའི་དབང་བོ་ཐམས་ཅདམ་ཁྱེན་པ་པདྨ་དཀར་པོའི་གསུང་འཕྲིན་ཁ་ཤས་བཞུགས་སོ།།
རྒྱལ་བའི་དབང་
བོ་ཐམས་ཅདམ་ཁྱེན་པ་པདྨ་དཀར་པོའི་གསུང་འཕྲིན་ཁ་ཤས་བཞུགས་སོ།། རིན་སྤུངས་ནས་མཆེན་ལ་གནང་བའི་ཆབ་ཤོག །ངག་གི་ལྷ་མོས་དགེ་དབང་ལ་བྱོན་པའི། །འདོད་དགོངས་སྙིང་པོ་ཅན་གྱི་ལུང་ཇི་
བཞིན། །ལོན་པས་འཇིག་རྟེན་ཁམས་ན་ད་ལྟ་ནི། །དབང་ཕྱུག་ཆེན་པོ་བརྙེས་པ་ཁྱོད་ཁོ་ན། །ཟ་འོག་འདབ་བརྒྱའི་དབུས་ན་ཀུན་ཤེས་པར། །ཟོལ་གྱིས་སྨྲ་བའི་གདོང་བཞི་ཀུན་གྱིས་བཀུར། །ཐམས་ཅད་གཟིགས་དེས་ཤཱཀྱི་བུ་གཅིག་པུ། །
10-106
ས་ལ་སློང་བ་ཅི་ཞེས་མཆིད་གསོལ་ནས། །རིགས་ཀྱི་ཐིག་ལེར་བསྐྲུན་པ་དག་གི་གདོང་། །ཀུན་གསལ་ཕང་པས་གྱེན་དུ་བཏེག་པའི་ཚེ། །ཞག་རེར་སྣང་བའི་འཕེལ་བ་དེ་ཙམ་ཞིག །ལྷོ་ཕྱོགས་འགོམ་པར་
དཀའ་ནའང་བྱུང་གྱུར་ཏམ། །ལྷ་མིན་གྱིས་རྦད་སྒྲ་གཅན་གཏུམ་པོའི་ཁས། །བཟུང་བ་དབྱིག་གི་ཁུ་བས་བཟོད་གྱུར་ཀྱང་། །ཕྱོགས་ལྷུང་འདབ་བརྒྱའི་འཕྲེང་བ་རྫབ་དབུས་སུ། །ཆུ་འཐུང་འགོག་འདི་ཞིམ་པོའི་དྲི་བསུང་
རྟུལ། །ཀྱེ་མ་ཀུན་རྟོག་འགྱུ་བ་རེ་རེའི་རྩེར། །སྲིད་པའི་སྐྱིད་སྡུག་མ་ལུས་ལེན་བཟོད་ཅེས། །བྱེད་པོར་བསྟོད་ཀྱང་འདི་ལྟ་བུའི་ཤབྟ། །མ་དྲན་གཏམ་དུ་ཟད་ཅེས་ཁང་བུར་ཉལ། །རྒྱ་མཚོ་དགའ་ལའང་
གདོན་འདོད་གོས་སྔོན་རྗེས། །ལྷུན་པོའི་ཅོག་ནས་བསྲུང་བ་མ་ནུས་པར། །རྒྱུ་སྐར་འདར་བས་དག་པའི་ཚིག་མེད་ཀྱང་། །གཟའ་ནང་ཁོ་ནར་དཔྱད་པས་མངོན་མིན་ནམ། །ཨེ་མ་གནམ་སྔོན་རིས་སུ་མ་ཆད་
པ། །ནམ་ཟླ་དུས་ཀྱིས་འགྱུར་བ་ཅི་དང་ཅིར། །འགྱུར་བ་དེ་དེ་སྤྲིན་གྱི་ཕོ་ཉ་འདི། །མཐུན་པའི་དཔེར་འོངས་ད་ནི་སྒྲུབ་ངག་ཚང་། །ཆོས་གྲགས་སྨ་བའི་འདུན་སར་ལག་བརྐྱང་པའི། །མདུན་དུ་ལུགས་
ངན་འཇོག་པ་བཟོད་པ་དང་། །རྡུལ་མང་བརྩེགས་པ་ཡིན་ཀྱང་རི་བོའི་སྤོ། །ཕྱེ་ལེབ་གཤོག་པའི་རླུང་གིས་བསྐྱོད་ནས་ཅི།། །།ཞེས་ལྕགས་རྟ་མགོ་ཟླ་ལ་བསམ་རྩེར་གནང་བའོ།།
༄། །གོང་མ་མིའི་དབང་པོ་སྐུ་བགྲེས་པར་འབུལ་བ་གནང་བ།
གོང་མ་མིའི་དབང་པོ་སྐུ་བགྲེས་པར་འབུལ་བ་གནང་བ།། 
10-107
སྟོབས་ལྡན་འཕྲོག་བྱེད་ཀྱིས་ནི་གཉིས་འཐུང་སྤྱི། །དབང་ཆེན་ནམ་དུས་འགྱུར་བས་ཨཱརྫ་ཀ །མཁྱེན་ལྡན་ཏ་ཡི་སི་ཏུས་གཞན་སྲིད་རྣམས། །གསིལ་བུར་བྱས་ལ་མི་མཚུངས་ཆ་ཤས་ཅི། །དེ་ཡི་གཟི་བྱིན་མཐོང་
བས་མི་དབང་རྣམས། །དཔའ་འཁུམས་ལག་པད་སྦྱར་བ་མདུན་དུ་བུབ། །ཡང་ཡང་བཏུད་པ་རལ་པའི་སྣུམ་བག་གིས། །དྲི་མར་བྱས་པའི་ཞབས་རྟེན་ལྡན་པའི་ཁྲིར། །མངོན་པར་དབང་བསྐུར་ཐོབ་པས་ཁྲེལ་ཡོད་ཀུན། །
སྤྱི་བོས་འདུད་པ་གྲགས་པའི་གདུགས་དཀར་པོ། །ས་གསུམ་གང་བ་སླད་ནས་མཛེས་པ་ཡི། །ཆོས་ཀྱི་རྒྱལ་པོ་ཆེན་པོ་དེའི་དྲུང་དུ། །ཏོང་ཁུན་བདག་པོ་དེང་འདིར་དབང་བགྱིད་ན། །དེས་བཀུར་འཇིག་རྟེན་
ངོམ་པ་རིགས་ན་ཡང་། །དེ་ལུང་རྣ་བའི་རྒྱན་ཙམ་ལས་མིན་པས། །དེ་དག་བླ་མར་སྨྲས་ཀྱང་བསྙོན་པའི་ཚིག །དེས་ན་ས་གསུམ་འདི་པ་ཐམས་ཅད་ཀྱི། །སྐྱབས་གནས་རྫོགས་པའི་སངས་རྒྱས་ཉིད་ཀྱི་
ལུང། །ངོམ་བོར་བགྱིད་ཀྱི་གཞན་ཆེ་མི་འགྲུབ་པའི། ། ཤཱཀྱའི་བྷི་ཀྵས་ཆོས་ཀྱི་མཆིད་འདི་ཞུ། །ནམ་མཁའི་སྐྱེད་ཚལ་ཕ་མཐའ་བརྒལ་འདིར་ནི། །ཆོས་ཀྱི་ཉི་མ་རྩེ་བར་མ་གྱུར་ན། །ཡངས་པའི་ས་ལ་
དགེ་ལེགས་མྱུ་གུའི་སྡེ། །ཕུན་ཚོགས་སྨན་པའི་འབྲས་འབྱུང་ག་ལ་སྲིད། །དེས་ན་བཟང་པོའི་སྲོལ་བསྒྲིབ་སྨག་རུམ་མུན། །འཕེལ་བས་མཚན་མོ་རྒྱ་བའི་གཉེན་སྙམ་ནས། །ཆོས་ལུགས་དཔྱིད་དབྱར་དུས་ལ་འཁུ་འདི་རྣམས། །
10-108
གཟེངས་མཐོར་གྱུར་གྱིས་ཚར་གཅོད་འོས་པ་ཉིད། །གང་ཡང་མི་དགེའི་རླུང་ཚུབ་རྣམས་བགག་ཅིང་། །དགེ་ལེགས་སྲོད་ཀྱི་འཕེལ་བ་ལེགས་སྤྲོ་བ། །ནམ་ཟླའི་རྒྱལ་པོ་ཁྱོད་ཀྱིས་བསྟན་དགོས་ཞེས། །ཀླ་ཀློའི་བ་མོར་
འཇིགས་རྣམས་གསོལ་བ་འདེབས། །རང་ལུགས་གོ་ལིང་སྐད་ཆེར་བསྒྲུབ་པའི་ཕྱིར། །གཞན་ལུགས་ཀ་ལ་པིངྐའི་དབྱངས་འགོག་པའི། །བཤད་པའི་ནགས་ཚལ་འདི་ཡང་ཡིད་སྐྱོའི་རྒྱུ། །དེ་སུན་ཕྱུང་ལ་འཐད་པར་སྟོན་པ་འོས། །
རབ་དགའི་གེ་སར་གཡོ་བ་ཡི། །པདྨའི་ཕྱོགས་ལྷུང་འདི་ཁོ་ན། །ཉི་མ་བསྔགས་པའི་རྒྱུར་གྱུར་བཞིན། །ལེགས་ལ་ལེགས་སོ་བགྱིད་པའང་མཚུངས། །ཤེས་པ་ཅན་རྣམས་མི་བཀུར་ན། །དབྱངས་ཅན་མ་ཡང་ངལ་བས་
སུ། །ལེགས་བཤད་རྒྱུད་མང་མི་བརྡུང་བར། །ཏམ་བུ་ར་ཡི་ཁང་བུར་སིམ། །འཐད་དང་མི་འཐད་དཔྱད་པ་ལ། །མཐུན་པར་ཁས་ལེན་མེད་དགོངས་ནས། །དཔའ་བོས་གླེགས་བམ་ཆེན་པོ་ནི། །བདག་ཉིད་ཆེས་བསྟུན་
དེ་གཟིགས་འཚལ། །གོང་ལ་བྱམས་དང་སྙིང་རྗེའི་བློས། །ས་སྐྱོང་གཏོང་ཕོད་འཛིན་པའི་མདུན། །མཁས་པའི་སྐྱེ་བོ་མི་དཀོན་པ། །ཡེ་དབང་ཞེས་བྱའི་འདུན་ས་བཞིན། །གང་ཉིད་དགེ་ལས་མི་གཡོ་བར། །གུས་པར་
གསོལ་བའང་ཕན་པ་སྟེ། །དམྱལ་བའི་མེར་ཡང་བུང་བའི་སྡེ། །པདྨའི་ཚལ་འཇུག་བཞིན་རྣམས་སོམས། །དག་པ་དག་པའི་ལུགས་འཛིན་པས། །དཀར་བ་དཀར་བའི་ཆོ་ག་ཡིས། །འཇིག་རྟེན་འཇིག་རྟེན་འདས་པ་ཀུན། །དར་ཞིང་དར་བ་ཉིད་དུ་འགྱུར། །
10-109
གང་ལ་དེ་གསོལ་རང་མིན་ན། །ཕྲམ་པ་ཉིད་འགྱུར་བདག་ཉིད་ཀྱི། །རྟག་པའི་བསྒྲུབ་བྱ་དེ་ལགས་པས། །གསོལ་འདི་མཛད་པ་ཁོ་ནའི་དབང་། །སྙན་ཚིག་ལ་སོགས་བྱུང་ཡང་ནི། །སྡེ་སྣོད་གསུམ་གྱིས་འཕོངས་
པས་སུ། །གཉིས་ལྡན་མཐའ་ལས་རྩོད་དུས་ཀྱི། །སྟོན་པའི་དུས་འདིར་བཟང་པོར་བསྔགས། །དེ་བས་བདག་ནི་མི་ངལ་བར། །རྒྱལ་བ་དགྱེས་པའི་ཆོ་ག་ཡིས། །སྙིང་གི་ཀུ་མུ་ཏ་ཕྱེ་བའི། །ཆུ་ཡིས་ཕྱོགས་
བཅུར་བྲན་ལ་བརྩོན། །ཆེན་པོའི་ཐོར་ཚུགས་འཆིང་ཆང་པས། །གཙུག་རྒྱན་རིང་པོར་འབོག་པ་བཞིན། །བདག་ཅག་རྣམས་ཀྱི་བླ་མ་ཡང་། །ཞིང་གཞན་བྱོན་པས་ངལ་འདི་པ། །བྱི་རུའི་སྡོང་བུ་གཡུ་ལོ་ཡིས། །སྤུད་
པའི་འཁྲི་ཤིང་འཕྲེང་བསྒྲིགས་པའི། །ངལ་བསོའི་སྟེགས་བུར་འདུག་བཅུག་བཞིན། །ཁྱོད་ཉིད་ཁོ་ནས་མཛད་པར་གྱུར། །གང་ལ་ཡི་རང་རྣམས་ཕུལ་ནས། །འདོད་འབྲས་ཐོབ་པ་འདི་དག་སླར། །ཁྱོད་དྲུང་ཉིད་དུ་བག་ཕེབས་
པར། །ཆས་རྣམས་སྔ་མ་བཞིན་སྐྱོང་འཚལ། །པདྨོ་ཅན་དང་ངང་པའི་སྡེ། །ལྷོ་ཡི་རླུང་ལ་བསིལ་བ་དང་། །ས་སྐྱོང་ཆོས་བཞིན་སྤྱོད་པའི་མདུན། །ཐར་འདོད་ཚོགས་པ་ཆོས་ལགས་སོ། །དེ་སྐད་ཞུ་བའི་རྟེན་
བཅས་ཏེ། །དབོ་ཡི་ཟླ་བའི་ཡར་ཚེས་ནི། །བཅུ་གསུམ་པ་ལ་ཀོང་ཡུལ་གྱི། །མྱང་སྨད་ས་ཡི་ཐིག་ལེ་ནས། །གུས་པར་བཅས་པ་ཕུལ་ཞུ་ཐོ།། །།
༄། །འབྲས་སྤུང་ཐམས་ཅད་མཁྱེན་པར་སོག་ཡུལ་དུ་ཕུལ་བའི་ཆབ་ཤོག།
འབྲས་སྤུང་ཐམས་ཅད་མཁྱེན་པར་སོག་ཡུལ་དུ་ཕུལ་བའི་ཆབ་ཤོག །
10-110
རྒྱལ་བའི་འབྱུང་གནས་ཐུགས་རྗེ་ག་པུར་རྒྱུན། །བསོད་ནམས་ཡངས་པོ་ནོར་འཛིན་མའི་དཔྱིད་དུ། །ངོ་མཚར་རྒྱ་མཚོ་གྲགས་པའི་རྦ་རླབས་ཀྱིས། །སྲིད་པའི་གདུང་སེལ་མཆོག་ལས་མཆོག་གྱུར་དྲུང་། །བཀའ་མཆིད་ཏོང་ཁུན་
གོས་ཟླུམ་སྐྱེས་བཅས་དང་། །ལྷན་ཅིག་སྙན་པའི་ཆ་ཀུན་བསྒྲགས་གྱུར་ཚེ། །ཡིད་དབང་ཆར་སྤྲིན་འབྲུག་སྒྲ་ཅན་མཐོང་བའི། །རྨ་བྱའི་ཟློས་གར་ཇི་བཞིན་རོལ་མོར་བྱེད། །དེང་དུས་ཐུབ་དབང་གཞུང་དུ་ལུང་བསྟན་
བཞིན། །བྱང་ནས་བྱང་ཕྱོགས་ཐུབ་བསྟན་སྤེལ་མཛད་པ། །དེ་འདྲ་གཉིས་པ་མེད་ངེས་དད་པས་ཀྱང་། །སྲིད་ཞུའི་རིམ་པ་ཐམས་ཅད་དེ་ཕྱོགས་བགྱིས། །སྟོབས་ཀྱི་འཁོར་ལོ་བསྒྱུར་བའི་ཆབ་སྲིད་ཀུན། །དམ་པའི་ཆོས་
ཀྱིས་ཉིན་མོར་མཛད་དེ་བཞིན། །དག་པའི་ཕྱོགས་འདིའི་བློ་གསལ་པདྨོའི་སྡེའི། ། ཤེས་པའི་གེ་སར་འགྱེད་ལ་སླར་འབྱོན་འོས། །སྤྱི་བརྟོལ་ཉིད་དང་ཅམ་བུ་ཙམ་མིན་པ། །ཁྱོད་བལྟ་འདོད་པ་ཅི་ཡང་མགྲིན་བསྟོད་
ན། །སྙིང་རྗེའི་དབང་གྱུར་ཁྱོད་ཀྱི་སྤྱན་རས་ཀྱང་། །མྱུར་དུ་བཙའ་བར་རིགས་སྙམ་བདག་སེམ་ལགས། །ངོས་ཀྱང་རྒྱལ་བའི་བསྟན་པ་རིན་པོ་ཆེ། །དར་ལས་འགྲོ་བར་ཕན་གཞན་མ་མཐོང་བས། །དེའི་ཆེད་བགྱི་
བ་རྟག་འགྲུས་གུས་སྦྱོར་གྱིས། །འཁོར་མོར་འདའ་བའང་ཁྱེད་ཀྱིས་མཁྱེན་པར་གསོལ། །སླད་ནས་ཞུ་འཕྲོད་རིམ་པར་བགྱིད་འདོད་ཀྱང་། །གནས་ཀྱིས་བསྐལ་པས་འཕྲལ་འཕྲལ་མ་ལགས་པས། །ཐུགས་བས་མེད་པར་སྔར་བཞིན་མཛད་དུ་གསོལ། །
10-111
ཞུ་ཐོ་གཟིགས་རྟེན་འཕགས་ཡུལ་ལྷ་ཡི་མཆོག །འཕགས་པ་ངལ་བསོས་སྐུ་ལ་རྟགས་ལྡན་པར། །ཀོང་ཡུལ་ཤར་ཕྱོགས་རྒྱལ་སྐོར་ལྷུན་བྲག་གི །སྒར་ནས་དུས་འཁོར་ལོ་འགོར་ཕུལ་ཞུ་ཡིག །བསོད་ནམས་ལྷུན་པོའི་
སྤོ་ལ་རབ་འཕགས་ཡེ་ཤེས་བཻཌཱུར་གཞལ་མེད་ཁང་། །བསྔགས་འོས་གྲོང་ཁྱེར་ཆེན་པོས་རབ་བསྐོར་ཆོས་ཀྱི་སྒོ་འཕང་བརྒྱད་ཁྲི་བར་། །མ་ལུས་འགྲོ་བ་རྣམ་གྲོལ་བདེ་བའི་དགའ་སྟོན་ལ་གཉེར་ཐུགས་རྗེའི་སྤྱན། །
བརྒྱ་ཕྲག་མང་པོའི་གཟིགས་པ་ཡངས་དེར་དད་པས་གཏུགས་ཏེ་ཕྱག་བགྱིའོ། །གང་གི་ངོ་མཚར་རོལ་མོ་ལས། །ཕྱོགས་དུས་ཀུན་གྱི་རྒྱལ་བ་ཀུན། །འཁྲུངས་ཕྱིར་རིན་ཆེན་འབྱུང་གནས་ཞེས། །དབྱངས་ཀྱིས་བསྟོད་འོས་འདི་
གཅིག་པུ། །དེ་ཕྱིར་ལུང་རིགས་མན་ངག་གིས། །དཔྱད་པའི་མར་མེ་བྱེ་བ་སྙེད། །ཐོགས་ནས་བཙལ་ཀྱང་གཞན་མེད་ནས། །མི་ཕྱེད་དད་པའི་མཆི་མ་བཀུ། །བདག་ཅག་བྱིས་སོགས་སྐྱོན་དབང་གིས། །དྲན་པའི་གཟུངས་
ཀྱིས་འཛིན་པ་ལས། །ཅུང་ཟད་གཡེལ་གྱི་གཞན་དུ་ན། །ཉིད་མཉམ་གོ་འཕར་ཅིས་མི་རེག །མ་འདྲིས་པ་ལ་མཛའ་བའི་གཉེན། །རྒྱལ་བའི་སྤྱི་གཟུགས་ཁྱོད་ལགས་པས། །འབྲལ་བ་ཉིད་ཀྱིས་འཁོར་བའི་མཐའ། །འདི་
ཙམ་སྙམ་རེས་བདག་སྐྱིད་དོ། །གང་ཞིག་བརྟགས་ཀྱིན་དཔྱད་ཀྱིན་དུ། །རྩ་བའི་བླ་མ་ལས་བླ་མ། །ཡོན་ཏན་མཆོག་སྲོལ་ག་ན་རྙེད། །དེ་བས་བདག་ནི་བྱང་ཆུབ་བར། །ངག་གི་དབང་ཕྱུག་ཆེ་བརྙེས་པའི། །
10-112
ཆོས་ཀྱི་རྒྱལ་པོའི་ཞབས་བསྟན་པས། །ཚོགས་གསུམ་མོད་ལ་རྫོགས་གྱུར་པས། །འགྲོ་བའི་འདྲེན་པར་གྱུར་ཅིག་གུ །འདི་ནའང་ཁྱོད་ཞལ་ལས་རྙེད་ཅིང་། །བཀའ་དྲིན་གྱིས་བརྣབས་ཆོས་ཀྱི་གཏམ། །གཞན་ལ་འཆད་ཅིང་ལུགས་
འགོད་པས། །ཕས་རྒོལ་ཐམས་ཅད་ཚར་གཅོད་ཤོག །དེ་ལྟར་བཤད་བཞིན་ཐོས་རྣམས་ཀྱང་། ། ཆོས་བསྒྲུབ་པ་ལ་མངོན་གཞོལ་བས། །ཡངས་པའི་ས་ཆེན་འདི་རྟག་ཏུ། །རྫོགས་ལྡན་དཔལ་ལ་གནས་གྱུར་ཅིག། །།
༄། །སྨོན་ལམ་གྱི་རིམ་པ་ཁ་འཐོར་བ་བཞུགས་སོ།།
སྨོན་ལམ་གྱི་
རིམ་པ་ཁ་འཐོར་བ་བཞུགས་སོ། །བདག་གི་དུས་གསུམ་དགེ་བ་འདི་དག་གིས། །སྡིག་དང་སྒྲིབ་པ་མ་ལུས་ཟད་བྱས་ཏེ། །རྟག་པར་དགེ་བའི་བཤེས་ཀྱིས་རྗེས་གཟུང་ནས། །ཚུལ་གནས་ཐོས་བསམ་སྒོམ་པ་
མཐར་ཕྱིན་ཤོག །སྨིན་བྱེད་དབང་ཐོབ་རིམ་གཉིས་ཟུང་འཇུག་གིས། །རྩ་རླུང་ཐིག་ལེ་སྦྱངས་ནས་དངས་མའི་ལུས། །ངེས་པར་སྐྱེ་བ་གཅིག་གིས་འགྲུབ་གྱུར་ཏེ། །རྡོ་རྗེ་འཆང་དབང་ས་ལ་གནས་པར་ཤོག །འདི་
ནས་གཟུང་སྟེ་སྐྱེ་དང་སྐྱེ་བ་རུ། །མཐའ་ཡས་འགྲོ་བ་ཀུན་གྱི་མགོན་དང་སྐྱབས། །ལམ་སྟོན་དགེ་བའི་བཤེས་སུ་བདག་གྱུར་ནས། །མ་ལུས་རྣམ་གྲོལ་མཆོག་ལ་འགོད་པར་ཤོག །ཁྲི་ལྕམ་དོན་ཡོད་སྒྲོལ་
མར་འཇིག་རྟེན་ན། །གྲགས་པ་དེ་ལ་བུར་གྱུར་ངས་འདི་བཀོད།།ཅེས་སོ། །མཁའ་མཉམ་འགྲོ་བ་ཀུན་གྱི་སྨན་གཅིག་པུ། །ཕན་དང་བདེ་བ་ཀུན་གྱི་དཔལ་འབྱུང་བའི། །ཐུབ་བསྟན་དམ་པ་རྙེད་དང་བཀུར་སྟི་ཡི། །
10-113
སྒོ་ནས་ས་ལ་དར་ཞིང་རྒྱས་གྱུར་ཅིག །བཤད་དང་སྒྲུབ་པའི་ཤིང་རྟའི་སྲོལ་ཆེན་པོས། །འགྲོ་རྣམས་ཐར་པའི་ལམ་ལ་འདྲེན་མཛད་པའི། །བསྟན་འཛིན་མཚུངས་པ་མེད་པའི་བཤེས་གཉེན་རྣམས། སྐུ་ཚེ་རིང་ཞིང་
འཕྲིན་ལས་རྒྱས་གྱུར་ཅིག །འདི་ནས་འཇིག་རྟེན་གཞན་གྱི་དོན་གཤེགས་པ། །ཀུན་གྱིས་ལམ་བར་ཆད་ཉེར་ཞི་ཞིང་། །བཞེད་དོན་རྣམ་པ་མ་ལུས་འགྲུབ་གྱུར་ཏེ། །སྤྲུལ་པས་རྟག་ཏུ་འགྲོ་ཕན་མཛད་གྱུར་ཅིག །
སེམས་ཅན་ཐམསཅད་བདེ་ཞིང་སྐྱིད་ལྡན་པ། །རྣམ་གྲོལ་བདེ་ཆེན་ས་ལམ་བགྲོད་པ་དང་། །བདག་ཀྱང་ཚེ་རབས་ཀུན་ཏུ་མཚན་ལྡན་གྱི། །དགེེ་བའི་བཤེས་གཉེན་འབའ་ཞིག་བསྟེན་པར་ཤོག །རྟག་ཏུ་བདག་ནི་དམ་
པའི་ཆོས་ཉན་ཞིང་། །བསྟན་པ་ཇི་བཞིན་བསྒྲུབ་ལ་མི་ངལ་བར། །ཐེག་ཆེན་འཕགས་པའི་སཾ་ལམ་རྫོགས་བགྱིས་ཏེ། །རྡོ་རྗེ་འཆར་དབང་ཚེ་འདིར་ཐོབ་པར་ཤོག །པདྨ་དཀར་པོས་ཀ་མ་རུ་པའི་གནས་མཆོག་
ཏུ་སྦྱར་པའོ།། །།

